كيفية تنضيف التوالات

سلام عليكم يا الفحلات

اليوم مع كيفية تنضيف التوالات و لا سال دو بان.

كي العادة جيت نفيد و نستفيد اليوم دالت التوالات حاشاكم و سال دو بان بعد ما هدرنا على الكوزينة

1. التوالات لازم كل يوم صباح تتغسل هي اساس النقا و الصحة خاصة المتزوجات (احم احم تمتم نمردو) المهم كي تنوضي الصباح و الموسيو يخرج سقمي روحك و ابداي راهم كاين ليبرودوي عجب ديري واش تحبي و خليه وحد 10 دقائق و غسليه من قاع الجوايح حتى الحيط وغسليه نشفيها مليح و ديري ديدوريزو

2. سال دو بان فيها بزاف خدمة الحااجة اللولة فرزي الحوايج و ديريهم يتغسلو فهاد الوقت ابداي تغسلي فالحيطان امبعد دوري لمراية و اكسسوار اللي فيها (سسست متخليهاش مشمخة تولي مظبة كامل جرنان و مسحي ) رجعي لقرع تاع شامبو وجماعتو فبلاصتهم اللي فارغة ارميها متحطيش كلش قدام المراية اللي تتخبى تتخبى و اللي تحتاجيها خليها

3.الصابون اغسلي باطة تاعو وحطيه و ديري صابون ليكيد لليدين ماشي تشري دوف ب90 و تغسلي بيه يديك كي تخرجي م......لالا اشري صابون ليكيد راو يتباع بلبيدو تاع 5لترات و كل ما تخلاص القرعة عمريها منها تقشف هههه كي العادة و منها تخلي دوف غير لوجهك يا محاينك 90 كل يوم ولا 3 بززززااااافف

5. ليجوتابل و ساشيات تاع لبودر اللي تنقي بيها عمرك و لا تخليها هكاك تكملي من ارميها من عيب يدخل عليك كاش واحد على غفلة تولي تجري

6. اغسلي لافابو و موراها متنسايش موراها مليييح مليييح بجافيل (انا نستعمل امير روعة) الارض تاني مسحيها كل ما تدخلي تغسلي و لا تتوضاي

7. الحبل اللي تغسلي بيه و الكاسة كي تكملي دوشي اغسليهم و خرجيهم يتشفو باش ميريحوش

8. يا الفحلة كي تكملي دوشي تمتم نتوايي واش درتي ماشي تقولي نروح نلبس و نشف شعري امبعد نتواييها راو يدخل راجلك و يسيبها هكاك

9. الشعر ثم الشعر كي دوشي تمتم ارفديه متخليهش يروح مع الما و يبوشيلك دوش (انا دايرة صفاية اي حاجة تدخل غلاد تشدها هي مسلكتني)

10. والحاجة المهمة سربيتة يا اختي اللي تمسهي بيها الصباح خرجيها تنشف و ديري وحدوخرا

11. اغسلي وجهك مليح بالصابون سيرتو عينيك مشي تخلي فيهم الكحل و نمسحي بسربيتة بيظة تولي مسودة خليها دايما نقية

12. بالنسبة لسرابتيري وحدة للوجه و وحدة لرجلين(اشرو هدوك الرخاص كامل) ووحدة اللي تمسحي بيها مالتحت تكون قطينة الله الله و اغسليها كال مرة متخليهاش باينة خبيها

13 . الماشينة كي تكملي غسيل الحوايج مسحيها و غطيها باش تقعدلك جديدة

14 . متكتريش حوايج البلاستيك فسال دو بان خليها سامبل البيدون و البسينة و السلة تاع الحوايج كامل خبيهم

15. كي تكملي الشغل تاع سال دو بان و التوالات حطيايما تابي عند الباب

16. البليغة حلي عينك تدخلي حفيانة لتوالات دايما بليغة قدام الباب مام كي يجيك ضيف يصيب باش يدخل ماشي يدخل بصباطو و راح نقى

اللي عندها حاجة خلاف تزيد تفيدنا بيها # دعواتكم و اضافاتكم كل ما اتمنى. #