كيف تختارين واقي الشمس المناسب لنوع بشرتك

كيفاش تختاري واقي الشمس☀

اولا الموضوع منقول من مدونة تعجبني بزااف و مواضيعها مفيدة و انا منحبش نخلي الفائدة غير ليا خلي نستفادو كاامل 

يجيوني منكم بزاف أسئلة فيما يخص واقي الشمس و خاصة كي تسقسيوني على كريم واقي الشمس المناسب لكل نوع بشرة donc حبيت اليوم نبسطلكم الموضوع على حساب خبرتي

اول حاجة انا صحيح كل مرة نحيلكم على ماركة معينة و اللي أكيد نكون جربتها  و لكن ماشي دايما les prix تناسب البنات كامل و خاصة صحاباتي اللي يقراو على هاذي نصيحتي ليكم بعد ما نفهمكم كيفاش تختاروا واقي الشمس الماركة مش راح تكون مهمة يعني تقدروا تشريو أي ماركة لكن المهم يكون الكريم مناسب لنوع بشرتكم

البشرة الجافة:

اصحاب هاذ النوع من البشرة كي تشريو واقي الشمس لازم يكون مكتوب عليه واحدة من هاذ الكلمات :  

-Crème solaire

-Lait..... 

-Lotion.... 

البشرة الدهنية أو المختلطة:  

بالنسبة لاصحاب هاذ النوع من البشرة يلقاو واحدة من هاذ الكلمات و الا العبارات التالية: 

*Émulsion 

*Fluide ou ultra fluide ou aqua Fluide (Hadi beaucoup plus pr les peaux Mixte)

*gel solaire ou gel solaire matifiant

*Anti brillance ou anti shine

*gel_crème 

*Toucher sec (dry touch en anglais) 

البشرة العادية :  

هاذا احسن نوع بشرة يقدروا يستعملوا نفس كريمات البشرة الجافة في الشتاء و في الصيف نفس كريمات البشرة المختلطة

البشرة الحساسة سواء جافة و الا دهنية: 

هاذي لازم قبل ما تشريو واقي الشمس و الا أي كريم اخر لازم تلقاو : 

-Hypoallergenique

-pour peau sensible 

-sans parfum

انشاء الله نكون ما نسيت والوا و هاذ المعلومات البسيطة تنفعكم و اللي تعرف منكم حاجة تزيد تحطهالنا حتى نستفادوا كامل

          Produit Peau Mixte et Grasse

حبيت نحكيلكم على هاذ الاكتشاااااف الهايل و اللي راني متأكدة صحاباتي اللي عندهم une peau Grasse راح يساعدهم  بزاااف psk هايل و ماهوش غالي

Le Gel Solaire Matifiant Sébionex de chez ACM Soins Dermatologique Algerie

هاذ كريم واقي الشمس gel solaire  مخصص لأصحاب البشرة الدهنية والمختلطة، و الحاجة االهايلة فيه أنوا 2 في 1 psk هو منوا كريم حماية قصوى ضد الشمس SPF 50 منوا كريم مرطب يعني يحمي البشرة من الشمس و يرطبها في نفس الوقت  و أهم  حاجة أنوا Matifiant يعني راح يمنع بشرتك تتزيت على طول اليوم

بالنسبة لتجربتي معاه:

أول ما استعملتوا تخلعت psk حسيتوا  دهني شوية على البشرة قلت Aww ياك راهم كاتبين بلي هو gel و matifiant وش بيه هاذا يتلبط هكذا ؟؟mais بعد نص ساعة شربتوا البشرة كامل و ما بقاش يبان و en plus وجهي ما تزيتش يوم كامل..و مع المداومة عليه لاحظت بلي هاذيك la trace تاع الخمار من الشمس و اللي نكرهوها كامل ما بقاتش و هاذ الشي يعني أنوا الحماااية تاعوا من الشمس vraiment عالية 

صحاباتي جربوه متأكدة راح يعجبكم و خاصة أنوا ماهوش غالي كامل يدير 1400دج برك و ممكن تلقاوه أقل ثاني و تلقاوه في كامل les pharmacies

ملاحظة : البنات هاذ la marque ACM هي ماركة فرنسية made in France 

ناشالله يكون عجبكم المقال خليولي تعليقاتكم تحت 👇